Author Archives: essubiryo

Bammemba ba Essuubiryo Zambogo SACCO tubakulisayo mu ttabamiruka wafe eyaliwo nga 28/03/2026 ku Buganda Royal Institute of Business and Technical Education  e Kakeeka Mengo.
Mu lutuula olwo Minisita w’abavubuka Owek.Robert Serwanga mweyasizidde okulangirira Owek.Joseph Balikuddembe Ssenkusu ku Kisanja ekyokubiri nga Ssentebe wa bboodi ya SACCO eno,era ono yakubirizza Bboodi okwongera okusitula omutindo gw’ekittavu kino okulaba nga Bammemba baakyo bafuna mu ssente ze baterekayo.

Akakiiko akakebera n’okutangira obulwa mu nzirukanya y’emirimu mu Bwakabaka, ka BARC, katudde mu lutuula lwako olusoose mu mwaka 2026, okukubaganya ebirowoozo ku Alipoota ya Kalondoozi w’Obwakabaka ku Nzirukanya y’Emirimu mu kitongole ki Essuubiryo Zambogo SACCO, ate n’Okuwuliziganya n’abatwala ekitongole kino ku byazuulibwa Kalondoozi w’Obwakabaka.

Olutuula luno lukubiriziddwa Ssentebe w’akakiiko era Omumyuka Asooka owa Katikkiro, Oweek. Prof. Twaha Kaawaase Kigongo, letabiddwamu ba mmemba abalala okuli; Oweek. Zulaika N. Kibirige, Akulira Kawempe Muslim SSS, Omuk. Uthman Mayanja, akulira ekitongole (Audit Firm) Price Water House Coupers (PWC) ne bammemba abalala.

Alipoota ezigenda mu makiiko kano zanjulibwa Kalondoozi w’Obwakabaka Omuk. Andrew Kalule ng’ayambibwako Omumyuka we Omw. Daniel Lukabwe era Omuwandiisi w’ekikugu akwanaganya emirimu gyonna (cordinator) mu woofiisi ya Kalondoozi.

Aba Essuubiryo Zambogo SACCO bakulembeddwa Minister w’Abavubuka, Emizannyo n’Ebitone, Oweek. Ssaalongo Robert Serwanga, Oweek. Hassan Kiyimba avunanyizibwa ku nsonga z’Abavubuka mu Bwakabaka, Oweek. Joseph Balikuddembe Ssenkusu ng’ono ye Ssentebe w’Olukiiko olufuzi olwa SACCO, Omuk. David Ssemakula ng’ono ye Ssentebe w’olukiiko olulondozi mu SACCO, Omuk. Gorreth Nassuuna ng’ono ye Ssenkulu wa SACCO ssaako Omuky. Gorret Nabulime ng’ono y’avunaanyizibwa ku by’ensimbi mu kitongole kino.

Akakiiko kalagidde aba Essuubiryo Zambogo SACCO bakole ku nsonga zonna ezinokoddwayo Kalondoozi w’Obwakabaka amangu ddala, era bamuwe alipoota eraga wa we batuuse mu kuteeka mu nkola amagezi g’abawadde ku buli nsonga, wakati mu kwetegekera okulungamizibwa bbanka ya Uganda enkulu ng’etteeka bwe ligamba.

Minisita w’Abavubuka, Emizannyo n’Ebitone Owek. Robert Serwanga Ssaalongo alambudde abakozi mu Essuubiryo Zambogo SACCO okulaba entambuza y’emirimu, okubazzaamu amaanyi n’okubakubiriza okusitula omutindo mu byonna bye bakola ng’Obwakabaka bwe bukutte n’amaanyi enteekateeka eno.

Owek. Serwanga akubirizza abakozi mu SACCO eno okufuba okukuumira ekifaananyi kyayo waggulu, bewale ekyejo ate n’abewozi abefuula ab’ekyejo babakwate mu ngeri ennungamu okulaba nga seente z’ekittavvu kino zikuumibwa mu mazima olwo bonna bammemba bafune empeereza ez’omutindo.

“Nzize kubazzaamu maanyi n’okubategeeza nti emirimu tugiraba era tusiima engeri gye mugitambuzaamu, tuli nammwe ekiseera kyonna okulaba nti ekiyongole kyongera okusituka bammemba bongere obungi era omutindo nagwo gusituke” Minisita Serwanga agamba nti buli wonna wabeera wabaawo kukula era ne Essuubiryo Zambogo SACCO ejja kwongera okukula.

Owek. Serwanga agamba nti Ssaabasajja Kabaka mu kuggulawo ekittavvu kino, yayagala abavubuka basigibwemu ensigo ey’okwemanyiza okukola, okufisa, okutereka n’okusiga. Agamba anti mu kutereka abantu basaana bafunemu ekyo kye bagenderera, bwatyo akubirizza abakola mu SACCO eno okukuuma obulungi ssente z’abantu ate nabo okubeera abegendereza mu kukola ssente ate bakuume n’obulamu bwabwe beewale obufere oba obubbi obuyinza okuva kw’abo abenonyeza ebyabwe.

Ssenkulu wa Essuubiryo Zambogo SACCO, Omuk. Gorreth Nassuuna asiimye nnyo obugenyi bwa Minisita buno n’ategeeza nti bugenda kubongera amaanyi mu ntambuza y’emirimu naddala nga basinziira ku kulungamizibwa kw’abawadde batuukire ddala ku mulamwa gw’Obwakabaka olw’okusitula omutindo.

Omuk. Nassuuna akowoodde abantu okwongera okwegatta ku Essuubiryo Zambogo SACCO ku mpeereza zaayo ez’enjawulo omuli; okugula emigabo, okutereka, okwewola n’endala.

Ensisinkano eno yetabiddwamu Ssentebe wa bboodi ya SACCO eno Owek. Joseph Balikuddembe, Omukwanaganya w’Abavubuka mu Buganda Owek. Hassan Kiyemba n’abakozi b’ekitongole kino.